- 84
- 1 minute read
वास्तव जगणे
वास्तव जगणे
हे कसे दिवस
पिसाळलेल्या कुत्र्यासारखे
मनातल्या सौजन्यावर येतात
पुन्हा पुन्हा धावून
अन् आपण सभ्यपणाची
झूल पांघरलेले कमजोर जीव
धड प्रतिकारही करू शकत नाही
आपणास खूप वाटते
हे जग बदलावे चुटकीसरशी
अन् सुखाच्या नद्या वाहाव्यात
आपल्या आकांक्षाच्या अंगणातून
परंतु असे कधी होतच नाही
उगवणारा प्रत्येक दिवस घेऊन येतो
उत्तरे नसलेल्या चिवट प्रश्नपत्रिका
आयुष्याची घोकंपट्टी जगणारे आपण
मग शोधतो बसतो उत्तरं केविलवाणे…
हे दिवसं असेच सरकत राहतात
आपल्या मोतीबिंदू झालेल्या डोळ्यांपुढून
आपण खूप धडपड करत असतो
एखादे तथ्याचे तारांगण पकडण्यासाठी
परंतु नेहमीच आपल्या हाती येत असतो
मिळमिळीत मिथकांचा मृत मोहेंजोदडो
हे दिवस कधी गुढ होत जातात
श्रावणातल्या सावल्यासारखे
अन् स्वप्न मृगजळ होऊन छळतात
पापण्यातील पावित्र्याला निरंतर
आता हे दिवस कधी बदलणार
याचा विचार करत न बसता
आपण चालत राहिले पाहिजे
आपल्याला हव्या असलेल्या दिशेने
मला वाटते यालाचा म्हणता येईल
वास्तव जीवन जगणे.
प्रा माधव सरकुंडे
