समाजवादी, आंबेडकरवादी व डाव्या पक्षांना सन्मानजनक जागा मिळाल्या नाहीत, तर नाराजीचा फटका मविआला बसेल….!

 विधानसभा निवडणुकीचा पडघम वाजला आहे. महाविकास आघाडी व महायुती मुकाबला करण्यासाठी निवडणुकीच्या मैदानात उतरण्याची तयारी करीत आहे. भाजपला काहीही करून राज्यात पुन्हा सत्ता आणायची असल्याने ते आपल्या मित्र पक्षासोबत सन्मानजनक जागा वाटप करीत आहेत. तर नेमके त्या उलट मविआमधील वातावरण आहे.

      2019 मध्ये 100 पेक्षा अधिक जागा लढून किमान 50 जागा ही जिंकू न शकणाऱ्या काँगेसला यावेळी ही 100 पेक्षा अधिक जागा हव्या आहेत. राष्ट्रवादी शरद पवार यांची जमिनीवरील अवस्था अतिशय वाईट आहे. कार्यकता नावाची गोष्टच या पक्षाकडे आता राहिलेली नाही. पण जागांचा आग्रह कायम आहे. मविआमधला सर्वात मोठा पक्ष असलेल्या शिवसेना उबाठाकडे तोडफोडीनंतर ही कार्यकर्त्यांची फळी मजबूत आहे. पण काँग्रेस व शरद पवारांनी उबाठाची कोंडी केली आहे. ती कशी फुटेल व त्यांच्या पदरात काय पडेल ते दोन दिवसात स्पष्ट होईलच. पण मतदारांमध्ये जाणारा हा मेसेज काही मविआसाठी चांगला नाही. त्यात मविआ डाव्या,समाजवादी व आंबेडकरवादी पक्षांना प्रतिनिधित्वच द्यायला तयार नसल्याने या पक्षामध्ये मविआबद्दल कमालीची नाराजी आहे. तसेच मुस्लिम व आंबेडकरी समाजाला मविआ संतोषजनक प्रतिनिधित्व देत नाही, हा मेसेज ही या समाजात जात असल्याने नाराजीचे सुरु उमटू लागले आहेत. हे सूर मविआला बेसूर करू शकतात. याचा विचार मविआने करायला हवा. नाहीतर हरियाणात जे घडले तेच महाराष्ट्र विधानसभा निवडणुकीत ही घडू शकते.

     महाराष्ट्र विधानसभा निवडणूक काहीही करून भाजपला जिंकायची आहे. मात्र वातावरण व परिस्थिती त्यांच्या बाजूने नाही. कुठल्याच स्थितीत भाजप व मित्र पक्ष निवडणुक जिंकू शकत नाहीत. हे भाजपला ही माहित आहे. पण काँगेस व राष्ट्रवादी करीत असलेल्या चुका व या दोन्ही पक्षाची नीती भाजपला विजय मिळवून देवू शकते. हा भरवसा संघ,भाजप व मोदीला आहे. अन त्याबाबतचे प्लॅन त्यांनी तयार केले आहे.ज्याची भनक ही मविआ आघाडीला नाही. जागा वाटपात काँगेस व राष्ट्रवादी जितकी कोंडी उबाठाची करेल, तितका फायदा शिंदे सेनेचा होणार आहे. तर आंबेडकरी पक्षांचा सहभाग उमेदवारीच्या रूपात निवडणुक मैदानात नसेल तर बी टीम म्हणजे वंचित, बसपा व नव्याने बी टीमचा घटक बनलेल्या आझाद समाज पार्टीचा पत्ता चालणार आहे. भाजपची आर्थिक रसद अन गोदी मिडियाची साथ या टीमला आहेच. त्यामुळे मत विभाजनाच्या माध्यमातून हे पक्ष मविआला किती डॅमेज करू शकतात, याचा अंदाज ही मविआच्या नेत्यांना नाही. ते याचा विचार ही करीत नाहीत. ते फक्त एकमेकांवर कुरघोडी करीत अधिक जागा पदरात पाडून घेण्यासाठी भांडत आहेत.निवडणूक लढणे अन जिंकणे यासाठी ही नीती नक्कीच योग्य नाही. कमी जागा लढवून अधिक जागा निवडून आणण्याचे धोरण काँग्रेस व राष्ट्रवादीचे असले पाहिजे. पण त्यांना अधिक जागा लढविण्यात इंटरेस्ट आहे.