आरक्षण विरोधकांच्या जीभेला लगाम घालणारी राहुल गांधींची नवी आरक्षणवादी भूमिका…!

       आजपासून एक शतकापूर्वी अथवा ९ दशकापूर्वी गोलमेज परिषद व अन्य मार्गाने संधी मिळताच डॉ. बाबासाहेब आंबेडकर यांनी दलित, शूद्र अतिशुद्राची ब्राह्मणी व्यवस्थेने केलेली दयनीय अवस्था जगासमोर मांडली. राहुल गांधी आज देशात व विदेशात ही तेच करीत आहेत. मग भाजपची बी टीम म्हणून काम करणाऱ्या तथाकथित आंबेडकरवादी पक्ष व संघटनांच्या नेत्यांना राहुल गांधींच्या या भूमिकाबाबत इतका आक्षेप का आहे ? तर यांचे उत्तर आहे, हे पक्ष एक तर भाजपसोबत आहेत, अथवा मतं विभाजनाचे राजकारण करीत ते भाजपला सहकार्य करीत आहेत. अन् अशा साऱ्या परिस्थितीत ही राहुल गांधी त्यांना कुठलाच स्पेशच मिळू देताना दिसत नाही. त्यामुळे त्यांचे तडफडणे साहजिकच आहे. ” नफरत के बजार में मोहब्बत की दुकान” खोलण्याचा जसा ते प्रयत्न करीत आहेत. तसाच प्रयत्न ते डॉ. बाबासाहेब आंबेडकर यांच्या नावाने दुकानदारी करणाऱ्यांचा बाजार उठविण्याचे काम ही करीत आहेत. म्हणुन ते राहुल गांधींवर इतके चिडत आहेत. नफरत करीत आहेत.
        राहुल गांधी यांनी आरक्षण व्यवस्था संपविण्याचे विधान करुन काँगेस आरक्षण विरोधी आहे, हेच दाखवून दिले, अशी आवई बसपा, वंचित व अन्य काही आंबेडकरवादी विचारांच्या पक्ष, संघटना व नेत्यांनी उठविली आहे. भाजपचा फायदा व इंडिया आघाडीचे नुकसान करण्यासाठीं त्यांनी ही आवई उठविली आहे. हे देशातील जनतेला कळत आहे. त्यामुळे त्यांनी राहुल गांधी व इंडिया आघाडीच्या विरोधात संविधान अन् आरक्षणाच्या मुद्द्यावरून किती ही आकडतांडव केले तरी त्याचा काहीच फायदा होणार नाही. पण संघ, भाजपची सुपारी घेतल्याने ध चा मा करून राहुल गांधींना बदनाम करण्याचा प्रयत्न हे करीत राहणारच. यात काही शंका नाही.
        राहुल गांधी आरक्षण विरोधी आहेत, अशी विधाने गेल्या दोन दिवसात संघ व भाजपच्या अनेक नेत्यांनी केली आहेत. यामध्ये तडीपारचा ही समावेश आहे. पण आरक्षणाच्या मुद्द्यावरून समाजवाद्यांची केंद्र व राज्यातील अनेक सरकारे पाडण्याचे महापाप संघ, भाजपच्या नावावर आहे. आरक्षणाच्या मुद्द्यावरूनच कर्प्यूरी ठाकुर यांचे बिहारमधील सरकार जनसंघाने पाडले आहे. तसेच विश्वनाथ प्रताप सिंग यांच्या नेतृत्वाखालील केंद्रातील सरकार भाजपने पाडले आहे. असे असताना राहुल गांधी यांना आरक्षण विरोधी ठरवित स्वतःला आरक्षण समर्थक ठरविण्यात या धर्मांध शक्तींना जरा ही लाज, शरम वाटत नाही.
         आता देशभरातील अनेक आंबेडकरीवादी पक्ष, संघटना हिंदु राष्ट्र निर्माण करायला निघालेल्या भाजपसोबत आहेत, त्यांनी आपापल्या राज्यात राहूल गांधींच्या विरोधात मोर्चा खोलला आहे. भाजप नेत्यासाठी दलाली करणारे या पक्षांचे पदाधिकारी, कार्यकर्ते हे मोर्चे काढत आहेत. या बिचाऱ्यांना राहुल गांधी काय बोलले हे ही माहित नाही. अन् माहित झाले तरी ते नीट समजून घ्यायला ही अक्कल लागते. हे बिचारे ते आणणार कुठून. यांच्या नेत्यांनी तर त्यांना भाजपच्या दावणीला बांधले आहे. बाकी काही असो राहुल गांधी यांच्या भूमिकेचा विपर्यास करुन संभ्रम निर्माण करण्याच्या प्रयत्नात राहुल गांधी यांची आरक्षणवादी भूमिका अधिकच स्पष्ट होत गेली असून आंबेडकरी विचारांचा मुखवटा घातलेल्या दलित नेतृत्वाचा चेहरा उघड होताना दिसत आहे.

_________________________________
– राहुल गायकवाड,
(महासचिव, समाजवादी पार्टी, महाराष्ट्र प्रदेश)