चांदवडचा ऐतिहासिक होळकरवाडा ‘रंगमहाल’ या नावाने ओळखला जातो. आता नष्ट झाली असली तरी या तीन चौकांच्या प्रशस्त प्रासादातील भिंती अनेक रंगीत चित्रांनी रंगविलेल्या होत्या. भव्य लाकडी कोरीवकामावर राजस्थानी शैलीचा स्पष्ट प्रभाव दिसतो.
        १९९० पर्यंत या भव्य प्रासादात औद्योगिक प्रशिक्षण केंद्रासह २१ सरकारी कार्यालये होती. त्यामुळे तिथे कायम माणसांची वर्दळ होती. हे स्थापत्य सुस्थितीत राहण्यासाठी हा राबता उपयुक्त ठरला. पण ही कार्यालये बंद झाल्यावर ‘रंगमहाला’चा रंग उडू लागला. वाड्याचे छप्पर व काही पडझड झाली. सध्या वाडा बंद आहे. २०२२ पासून तिथे संथगतीने दुरुस्तीची कामे चालू आहेत.
        रंगमहालाचे मुख्य प्रवेशद्वार बंद असले तरी आत जिर्णोद्धार करणारे कामगार जिथून जा-ये करतात तिथून जाऊन वाडा पाहिला. आतील कामास गती आली व पुरेसा निधी वेळेत प्राप्त झाला तर ‘रंगमहाल’ पुन्हा त्याचे नाव सार्थ करील !
         सोबतचे फोटो पाहिले तर ‘रंगमहाल’ कधीकाळी किती ऐश्वर्यसंपन्नतेचा साक्षीदार होता ते सहज कळते.