मोदी जगभर फिरले; पण, शेजारील राष्ट्रही कट्टर शत्रू बनले !

    आपल्या 11वर्षांच्या सत्ताकाळात प्रचंड अहंकाराने मोदींनी विरोधकांची सतत खिल्ली उडविली, अवमान, अपमान केला. संसदेत जनविरोधी जितके कायदे करता येतील तितके केले, संसदेची प्रतिमा आवारा बनवून टाकली. इतके असताना ही देशावर संकट येताच विरोधक हे सर्व विसरून सरकारसोबत उभे राहिले. सर्व पक्षीय बैठकांमध्ये सरकारवर पूर्ण विश्वास व्यक्त केला. पण त्या विश्वासास ही पात्र होण्याची कुवत मोदी व त्यांच्या सरकारमध्ये नाही. हे पहलगाम आतंकी हल्ला आणि त्यानंतर पीओकेमधील अतिरेकी अड्ड्यांवर कारवाई प्रकरणी मोदीने दाखवून दिले. संकट व युद्धजन्य परिस्थितीत ही मोदीने धार्मिक अजेंडा, गोदी मिडिया, संघ, भाजप व आय टी. सेलच्या माध्यमातून राबविल्याने संपूर्ण जगभर आपल्या देशाचीप्रतिमा खराब झाली, तर पाकिस्तान विषयी सहानुभूती निर्माण झालेली आहे. ज्या ट्रॅम्पला निवडून आणण्यासाठी मोदी व भक्तांनी जीवाचे रान केले, यज्ञयाग केले होते, त्याच ट्रम्पने या युद्धजन्य परिस्थितीत ज्या भूमिका घेतल्या, धमक्या दिल्या, त्यामुळे तर मोदींच्या इज्जतीच्या चिंध्या झालेल्या आहेत. आज एक ही देश आपल्या सोबत उभा राहायला तयार नाही. नेहरू, इंदिरा गांधींच्या सत्ताकाळापासून मित्र असलेला रशिया ही आता भारताला धमक्या देवू लागला असल्याने, पाकमध्ये आनंदोत्सव साजरा होत आहे. पाकची ही कृती पहलगामच्या अतिरेकी घटनेवर मीठ चोळण्या सारखी व मोदी सरकारच्या विदेश नीतीची खिल्ली उडविणारी आहे.