आंबेडकरी जनतेचे व मतांचे मालक समजणाऱ्या नेत्यांना, आंबेडकरी जनतेने धडा शिकविल्याने नेते वैफल्यग्रस्त…!

                                         आंबेडकरी मतांचे विभाजन झाले नसते तर
                                                एनडीए सत्तेच्या बाहेर असती….

        आंबेडकरी समाज हा सुज्ञ, प्रगल्भ व प्रबुद्ध आहे. ” मी प्रथम भारतीय व नंतर ही भारतीयच आहे,” हा डॉ. आंबेडकर यांनी दिलेला मंत्र या समाजाच्या मनावर कोरला गेलेला आहे, याचे भान प्रकाश आंबेडकर व अन्य आंबेडकरी नेत्यांना असते तर भाजपसोबत जाणे व मतं कूजवून भाजपला मदत करण्याची भूमिका या नेत्यांनी नक्कीच घेतली नसती. पण आजचे आंबेडकरी नेतृत्व हे भान हरपलेले नेतृत्व आहे. हे त्यांनी का केले याच्या अनेक सुरस कहाण्या आता सर्वत्र चर्चेत आहेत. लाज – इज्जत काढणाऱ्या आहेत. आंबेडकरी समाज जितका सुज्ञ, प्रगल्भ आहे, तितकेच सुज्ञ व प्रगल्भ नेतृत्व असते, तर ही बेअब्रू वाट्याला आली नसती. महाराष्ट्र व उत्तर प्रदेशातील आंबेडकरी विचारांच्या नेत्यांनी व पक्षांनी मतं कुजविण्याचा निर्णय घेतला नसता तर, भारतीय संसदीय राजकारणातील चित्र वेगळे असते. भाजप सत्तेच्या बाहेर असता. संविधान व लोकशाही व्यवस्थे विरुध्द असणाऱ्या भाजपला महाराष्ट्रातील व उत्तर प्रदेशातील नेतृत्वाने पुन्हा सत्तेवर बसविले आहे. ही अत्यंत लाजिरवाणी बाब आहे.
         आंबेडकरी विचारांचे पक्ष व नेते आंबेडकरी जनतेचे मालक अन आंबेडकरी मतांचे ठेकेदार झाले आहेत. हे त्यांची भुमिका व व्यवहारावरून स्पष्ट दिसत आहे. उत्तर प्रदेशात मायावती व महाराष्ट्रात प्रकाश आंबेडकर, रामदास आठवले, गवई व कवाडे तसेच वागत आहे. आंबेडकरी समाज व कार्यकर्ते आपले गुलाम आहेत, अशाच प्रकारे ते त्यांच्याशी वागत आहेत. प्रकाश आंबेडकर यांनी तर २०१९ व २०२४ मध्ये निवडणुकीत कार्यकर्त्यांना डावलून, विश्वासात न घेता चरित्र व चारित्र्य नसलेले बाहेरचे उमेदवार उभे करून त्यांना कार्यकर्त्यांच्या बोकांडी बसविले आहे. अन् या उमेदवारांनी आपले उखळ पांढरे करून घेतले आहे. नुकत्याच झालेल्या लोकसभा निवडणुकीत लातूर लोकसभा मतदारसंघातून वंचितने नरसिंहराव उदगीरकर यांना उमेदवारी दिली. उदगीरकर हे राष्ट्रवादी ( शरद पवार) यांच्याकडून उमेदवारी मागत होते. ती मिळाली नाही. त्यामुळे ते वंचितचे उमेदवार झाले. २०१९ मध्ये याच मतदारसंघात वंचितचे राम गावकर यांना १ लाख १२ हजार मतदान झाल्यामुळे यावेळी वंचितचा फॅक्टर काम करेल व मविआचा उमेदवार पडेल, असेच चित्र होते. त्यामुळे व्यवहार ही मोठाच झाला असणार ? पण तसे घडले नाही. मविआ निवडणूक जिंकली. मात्र निवडणूक संपताच वंचितचे येथील उमेदवार नरसिंहराव उदगीरकर यांनी लैड रोवर, रेंज रोवर व फॉरच्युर या दोन गाड्या विकत घेतल्या. त्या काही अशाच घेतल्या नाहीत. उमेदवारांच्या दारात हे वैभव येत असेल तर नेत्यांची किती चंगळ व सुवर्णकाळ असेल. ही बाब आंबेडकरी मतदारांनी आधीच हेरली होती म्हणून शिक्षित, अल्प शिक्षित व निरक्षर अशा सर्व प्रकारच्या मतदारांनी वंचितला 2024 च्या निवडणुकीत पूर्णपणे नाकारले. याचा याचा विचार आंबेडकरी चळवळीतील कार्यकर्त्यांनी करायला हवा.
          प्रकाश आंबेडकर यांना २०१९ च्या लोकसभा व विधानसभा निवडणुकीतुन अनेक गोष्टी शिकता आल्या असत्या. पण काहीच शिकायचे नाही, हे त्यांनी ठरविले आहे. उलट झालेल्या चुकांचीच पुन्हा पुनरावृत्ती करीत जुनेच धोरण अधिकृत धोरण म्हणून स्वीकारायचे हिच भूमिका त्यांची यावेळी ही राहिली होती. या धोरणांतर्गत त्यांनी मतं विभाजन करण्याची सुपारी घेतली व जुनाच प्रयोग नव्याने सादर केला. थेट भाजपकडून ही काही उमेदवार त्यांनी घेतले व मतं विभाजन करून संविधान विरोधी भाजपला मदत केली . प्रकाश आंबेडकर यांची सुपारी घेण्या इतकी लायकी आज ही आहे. मात्र जे लायक नव्हते, ते सरळ भाजपसोबत उभे राहिले. हे समाजाने पाहिले व अशा नेत्यांना आंबेडकरी समाजाने त्यांची जागा दाखवून दिली.
         देशात इंडिया आघाडी उभी राहिल्यानंतर भाजप व मोदींच्या सत्तेला आव्हान उभे राहिले. महाराष्ट्रात काँग्रेस, राष्ट्रवादी (शरद पवार) व शिवसेना (उबाठा) हे या आघाडीतील प्रमुख घटक पक्ष. याच घटक पक्षात मतभेद निर्माण करून त्यांना वेगळे करण्याचा प्रयत्न प्रकाश आंबेडकर यांनी शिवसेनेसोबत युतीचे नाटक करून केला होता. उद्धव ठाकरेंना मविआच्या युतीतून बाहेर काढण्याचा हा कट होता व या कटाचे सुत्रधार ही संघ अन भाजपच होती. पण उद्धव ठाकरे यांच्या समजस्यपणामुळे प्रकाश आंबेडकर यांना त्यात यश मिळाले नाही. त्या शिवाय संविधान व लोकशाही विरोधी भाजपला अशा प्रकारे मदत करण्या मागची प्रकाश आंबेडकर यांची भूमिका नक्कीच आंबेडकरी विचारांना व चळवळीला पोषक नाही. याचा विचार या पुढील काळात झाला पाहिजे. तो झाला तरच प्रकाश आंबेडकरांनी आंबेडकरी चळवळीची केलेली कोंडी फुटेल…!

– राहुल गायकवाड,
(महासचिव, समाजवादी पार्टी,महाराष्ट्र प्रदेश)