छ.शिवाजी महाराज पुतळा प्रकरणी जयदीप आपटे, संघ, भाजप व नौदलाचे कनेक्शन तपासण्याची गरज…!

        पुतळा उभारण्याचे काम करणाऱ्या अनेक शिल्पकारांचे म्हणणे आहे की, इतका भव्य दिव्य अन् ब्राँझचा पुतळा उभाण्यासाठी किमान ३ वर्षांचा कालावधी लागू शकतो. मग हा पुतळा ७ महिन्यात उभा करण्याचे कारण काय होते ? हा प्रश्न सहज पडू शकतो. तर याचे कारण स्पष्ट आहे की, हा पुतळा उभा करून होऊ घातलेल्या लोकसभा निवडणुकीत याचा लाभ उठविण्यासाठी काल मर्यादा धाब्यावर बसवून हा पुतळा उभारण्यात आला. त्यासाठी मोदी सरकारचा नौदलावर दबाव असणार व त्याच दबावापोटी हा पुतळा ३ वर्षां ऐवजी ७ महिन्यातच उभारला गेला, हे स्पष्ट आहे. या प्रकरणाचा तपास राज्यातील पोलिसांच्या हाती राहिला, तर कुणाला ही काहीच शिक्षा होणार नाही. हा प्रश्न जोवर चर्चेत आहे, तोवर जनतेत याची चर्चा ही होईल. पण जेव्हा दूसरे एखादे प्रकरण उभे राहिले, तर लोक हे पुतळा प्रकरण व छत्रपती शिवाजी महाराजांचा झालेला अवमान व अपमान सर्वच विसरून नव्या विषयांवर चर्चा करतील. अन् नवे विषय देण्यात मोदी खूपच पटाईत आहेत.
        लोकसभेच्या होऊ घातलेल्या निवडणुका डोळ्यांसमोर ठेवून घाई करुन हा छत्रपती शिवाजी महाराजांचा पुतळा उभरण्यात उभारण्यात आला आहे. महाराष्ट्रात निवडणुकीला जाताना मतदारांना सांगण्यासाठी काहीतरी असावे म्हणून हा पुतळा उभा करण्यात आला. अन् पुतळा बसविण्याचे काम हे नौदलाच्या अखत्यारित असल्याने या प्रकरणास पंतप्रधान म्हणून मोदीच जबाबदार आहेत. अन् महत्त्वाचे म्हणजे या प्रकरणी पुतळा घाईघाईत उभा केल्याने कालमर्यादेचे उल्लंघन झालेले आहे. केवळ निवडणुका जिंकण्यासाठी असे कांड करणे पंतप्रधानपदावर असलेल्या व्यक्तीला शोभत नाही. त्यामुळे या प्रकरणात मोदींचा निषेध करावा तितका थोडाच आहे. असे असताना याच छत्रपतींच्या भूमीत येऊन माफी मागण्याची लाज मोदीला वाटायला हवी होती. पण लाज लज्जा नावाची गोष्ट त्यांच्याकडे राहिलेलीच नाही. सत्तेसाठी वाट्टेल ते करण्याची तयारी त्यांची नेहमीच असते. २०१९ च्या निवडणुकीला सामोरे जाताना ही त्यांनी पुलवामामध्ये ४० जवानांना शहीद केले होतेच.
        बाकी माफी मागत असताना मोदीने आणखी एक घोडचूक केली आहे. ती म्हणजे सावरकर यांचा उल्लेख करून. छत्रपती शिवाजी महाराज यांचा जन्म व राजा होणे यास काकतालीय योग म्हणणाऱ्या सावरकरांचा उल्लेख करीत माफी मागणे, ही नीचपणाची हद्द आहे. सावरकरांनी पूर्णपणे शिवशाहीच्या विरोधात लिखाण केले आहे. छत्रपतींच्या अवगुणांवर बोलण्याचे धाडस आजपर्यंत जगात कुणाचेच झाले नाही. मात्र सावरकर यावर जाहीर भाष्य करतात. छत्रपती राजे संभाजी यांच्याबद्दल ही ते वाईट लिहितात. त्या सावरकरांचा उल्लेख शिवप्रेमीची माफी मागत असताना करून मोदीने महाराष्ट्रातील जनतेच्या जखमेवर मीठ चोळले आहे. याचा सूड, बदला राज्यातील जनता येणाऱ्या विधानसभा निवडणुकीत नक्कीच घेईल. हे मात्र खरे……!

_________________

– राहुल गायकवाड
(महासचिव, समाजवादी पार्टी,महाराष्ट्र प्रदेश)